شريف مدكور يذكر أفضل طريقة للحفاظ على وزن مثالي دائم

بواسطه إسراء صادق | السبت , 24 مارس 2018 ,12:24 م



الإعلامي شريف مدكور من أشهر الإعلاميين الذين تخصصوا في برامج الأسرة والمرأة والطفل، وله باع طويل في هذا المجال، نظرًا لمن ألتقى بهم خلال برامجه المتعددة من خبراء تغذية وعلاقات وأطباء وغيره، فضلًا عن كونه يتبع أسلوب حياة صحي على المستوى الشخصي.

وهذا ما جعلنا نتطرق معه خلال وجوده في ضيافة "لهلوبة" إلى هوس الرشاقة لدى النساء، وعن مقترحاته ونصائحه من أجل تحقيق حلم الوصول للوزن المثالي والحفاظ عليه.

أوضح شريف مدكور أن الأمر سهل للغاية ويتلخص في الحفاظ على مواعيد ثابتة للأكل، قائلًا: "الموضوع مش متعلق بالستات بس هو الست والراجل والأطفال كله لازم يبقى جسمه كويس، والموضوع سهل جدًا إن يبقى عندنا مواعيد للأكل".

واستكمل: "يعني بنفطر مثلا الساعة 8 الصبح، كلي زي ما انتي عايزة حتى لو هتاكلي خروف، بس تقعدي لغاية الساعة 12 مثلًا ممكن تاكلي خيارة أو جزرة أو كم ورقة خص أو تفاحة، وتعالي بقى الساعة 3 اتغدي وكلي اللي انتي عايزاه، وعلى الساعة 5 ممكن تاكلي مع الشاي كده بسكوتة بس مش باكوا بسكويت".

واستطرد: "تعالي بقى على الساعة 8 ونص أو 9 اتعشي اللي أنتي عايزاه، بس ما تناميش غير بعدها بـ 3 ساعات، عمرك ما هتتخني، وكده عمر ما حد هيتخن أصلًا، ما أنا أهو عندي 45 سنة وباكل أكل فظيع وعندنا في البيت كلنا بناكل، بس بناكل في مواعيد محددة".

وأضاف: "ساعات أنا باخد معايا عمود من بيتنا فيه أكل، وبيفضل الأكل سخن فيه علشان أنا عندي معاد اتغدى فيه ومابتكسفش، وقليل أوي أني أطلب معاهم أكل جاهز والكلام ده، ده أكل ما باكلوش، فـ ما بتخنش".

كما علق مدكور على أنه لا يحب الفتاة شديدة الرفع أو كما قال: "اللي بيقولوا عليها جلد على عظم"، كما أنتقد أيضًا في نفس الوقت مصطلح "كيرفي" الذي أنتشر بكثرة مؤخرًا ووصفه بـ"العيب".

وعبر مدكور قائلًا: "مش المفروض البنت يتقال عليها كده ده عيب، وإزاي البنات تقبل إن يتقال عليها كده، أصل البنت مش سلعة علشان أقول عليها كيرفي مايصحش، والبنت مش بجسمها ولا بشكلها، ولا الراجل كمان لأن الشكل ده هيروح، واسم المصطلح كيرفي أصلًا بايخ".

وأضاف: "احنا البنات عندنا في مصر بقوا شاطرين أوي، والدليل على كده كنا نلاقي زمان أوائل الثانوية العامة أدبي بنات وعلمي ولاد، دلوقتي العلمي بقوا بنات بس، فلازم البنت المصرية تخلي بالها من شطارتها دي وتزودها وماتخليش المجتمع الذكوري اللي احنا عايشين فيه إنها تتنازل عن النجاح اللي هي نجحته لأنها بتتحارب".

واستكمل: "احنا لسه في أي مصلحة حكومية أو في أي مكان هتلاقي عايزين الراجل يبقى هو المدير، الراجل هو اللي ياخد مرتب أكبر، طب ما هي بتشتغل أكتر منك على فكرة، يعني مثلا دلوقتي أشطر 4 وزراء في الحكومة ستات وكلنا حافظين أساميهم وكمان محافظة البحيرة".

 

موضوعات متعلقة:

شريف مدكور يتحدث عن أخطاء التربية و يروي قصة فتاة انتقمت من أهلها بطريقة صادمة

شريف مدكور: "أنا شايف أني شخص لهلوب والرجالة اللي ما بتساعدش في شغل البيت فرافير"

شريف مدكور: "الست اللي بتهمل في جمالها علشان بيتها بترتكب مصيبة في حق نفسها

شريف مدكور: "برامج الطبخ هي اللي شهرتني بس ماعنديش خلق أطبخ"

شريف مدكور: "الهدوم بتحبني لما بلبسها والموضة العالمية لا تناسبني"

 


قولى رأيك

تابعنا علي فيسبوك