شريف مدكور: طريقة تربية الأمهات للأبناء الذكور سببًا رئيسيًا لكثرة حالات الطلاق 

بواسطه إسراء صادق | الثلاثاء , 20 مارس 2018 ,9:32 ص



تحدث الإعلامي شريف مدكور عن حالات الطلاق المتكررة وفشل العلاقات الذي تزايد عن الحد مؤخرًا في مصر، وفي حوار خاص مع "لهلوبة" أوضح أسباب المشكلة من وجهة نظره طبقًا لما تعرض له من حالات ودراسات في برنامجه.

وذكر شريف مدكور أن لدينا في مصر نحو 250 حالة طلاق سنويًا وعبر قائلًا: "والعيب في الراجل مش الست، مفيش ست عايزة تخرب بيتها ومفيش ست عايزة تبقى مطلقة، فالمشكلة عندنا في الراجل المصري".

وأوضح قائلًا: "الأنوثة اللي في المرأة بتحتم عليها إن يبقى معاها راجل تحبه ويدلعها ويقولها كلام حلو، هتبقى كويسة أوي معاه، لكن المشكلة اللي حصلت عندنا إن إحنا في مجتمع ذكوري حصله صدمة ثقافية بقاله 40 سنة، من ساعة الانفتاح سنة 75.

واستطرد: "بعد الصدمة الثقافية دي اللي حصل إن الستات الأمهات بقت تدلع الولد، وده كان الأول موجود أكتر في الصعيد، بقى موجود في كله، الأم عايزة تدلع الواد وتتباهي وتتفاخر بيه، فتيجي على نفسها وتدخله مدرسة غالية، وتقول لأخته اعملي لأخوكي كذا وكذا، يكبر بقى الواد شوية يسقط في المدرسة تخبي على أبوه وتمضي هي علشان أبوه مايزعقلوش والولد مايتعقدش".

وأضاف: "بعدين يكبر يبقى شحط في الجامعة، يدخل على أمه وهي تعبانة ماما سخنيلي، ماما اديني مش عارف إيه، عايز أروح الجيم، ماما أنا صاحبت واحدة اديني فلوس اجبلها هدية في الفلانتين، وماما بتديله ما بتقولش لا انشالله تبيع حتتين الصيغة بتاعتها علشان تجبله اللي هو عايزه، وبتقول للبنت لا".

واستطرد: "يجي بقى يكبر وماما عايز أتجوز، هتتجوز ازاي؟ أنت بتشتغل؟ عندك شقة؟ أنت عايز تشتغل أصلا؟، فتروح ماما تستدين علشان تجوزه، الستات الغارمات اللي في السجون دول أغلبهم ماضيين كمبيالات علشان يجوزوا الواد مش البنت، وبعد ما امه تعمله كل ده ويتجوز، عايز بقى واحده تعمله اللي أمه كانت بتعمله.. فيتفاجيء أنها بتقوله بس أنا مش ماما يا حبيبي".

وأنهى كلامه في هذه النقطة قائلًا: "ده اللي أدى إلى إن الطلاق بقى كتير أوي في مصر، ومع احترامنا لشيوخ الأزهر اللي بيقولوا الطلاق الشفوي ده يمشي، طب إزاي هو أنا لما باجي أتجوز واحدة مش بروح أعقد قراني عليها، طب ما لما أجي أطلق واحدة أروح أعقد طلاقي عليها، بس حتى الشيوخ مستسهلين، ما هي الست عندهم مش فارقة.

 

موضوعات متعلقة:

شريف مدكور: "برامج الطبخ هي اللي شهرتني بس ماعنديش خلق أطبخ"

شريف مدكور: "الهدوم بتحبني لما بلبسها والموضة العالمية لا تناسبني"

شريف مدكور: "أنا شايف أني شخص لهلوب والرجالة اللي ما بتساعدش في شغل البيت فرافير"

شريف مدكور: "الست اللي بتهمل في جمالها علشان بيتها بترتكب مصيبة في حق نفسها"

شريف مدكور يتحدث عن أخطاء التربية و يروي قصة فتاة انتقمت من أهلها بطريقة صادمة


قولى رأيك

تابعنا علي فيسبوك