فنانة مصرية تنشر فيديو يوثق لحظة التحرش بها وتعلق "عايزة حقي"

بواسطه هند جمال | الأربعاء , 26 يناير 2022 ,12:33 م

فنانة مصرية تنشر فيديو يوثق لحظة التحرش بها وتعلق عايزة حقي


نشرت الفنانة كارولين عزمي، مقطع فيديو يوثق لحظة تعرضها للتحرش داخل سيارتها على حسابها الشخصي بموقع التواصل الاجتماعي "إنستجرام" وعلقت على الفيديو قائلة: "مساء الخير، أنا اللي يعرفني أو متابعني عارف أني شخص مالوش في المشاكل، ولا عمري شاركت مشكله تخصني سوشيال ميديا".

وأضافت: "النهاردة كنت في عربيتي وجنبي عربية فيها واحد كسر عليا كل اللي عملته إنى بصيت له وبصيت قدامي، فلقيته بيكرر نفس الحركة تاني باستظراف، روحت طلعت الموبايل وعملت نفسي بصور عشان أخوفه وأخليه يبطل يضايقني، اتفاجأت وهو بيقول لى بتصوريني يا بنت ...".

وتابعت: "ساعتها اتخضيت وبدأت أصور بجد وأنتم هتشوفوا في الفيديو الحركات اللي بإيده والشتايم، وبدأ يقول لي تعالي ورايا، والحقيقة إني مش عارفة أروح وراه فين أو كان عايز يعمل إيه، ولأني اتوترت وخفت ساعتها ما قدرتش أصور 1% من اللي عمله الشخص دا".

واختتمت: "أنا اتشمت واتهنت واتشمت بأهلي بأقذر الشتايم النهاردة من حد معرفوش ولا عملت له حاجة، ولا فتحت بوقي لمجرد إنه شخص مريض!، أكيد الشخص دا أذى بنات كتير لإنه تقريبا متعود على الحركات دي، ومتعود يخوفهم ومش همه حتى إنه يتصور ويتفضح، أنا عايزة حقي يرجع لي".

 

يذكر أن أخر أعمال الفنانة كارولين عزمي هو مسلسل أبو العروسة الجزء الثالث  الذي من المقرر عرضه يوم 29 يناير الجاري، بطولة الفنانة سوسن بدر، والفنان سيد رجب، ولاء الشريف، محمد عادل، مدحت صالح، نيرمين الفقي وآخرون.


قولى رأيك

تابعنا علي فيسبوك