حكايات الجدة لولو.. لو بتحتاري في حدوتة قبل النوم

بواسطه إسراء صادق الثلاثاء , 25 يوليو 2023 ,11:06 ص



 مواقع التواصل الاجتماعي وبالتحديد "فيسبوك" تتفنن في توفير الخدمات للمستخدمين بشكل مثير للدهشة، فحاليا لا توجد خدمة نبحث عنها لا نستطيع الوصول اليها من خلال مواقع التواصل، حتى تلك الفكرة البسيطة جدًا ولكنها مفيدة بقدر بساطتها "حكايات الجدة لولو".


"حكايات الجدة لولو" صفحة انشأتها فتاة شابة تدعى ريهام سالم، هدفت من خلالها إلى تسلية والدتها التي تجلس فترات طويلة بمفردها بالمنزل ولديها العديد من الحكايات والحواديت الممتعة، قررت ريهام ان تتلقى تلك الحكايات اللطيفة من ولدتها وتصيغها بطريقة بسيطة وفي حجم صغير وتعرضها يوميًا في شكل حكاية قبل النوم، وهو أمر ما زال سائدٍ لدى الكثير من الأمهات وأحيانًا تصيبهم الحيرة بعد استنفاذ كل حكايتهم القديمة التي توارثوها عن أمهاتهم وجداتهم.

اعرفي اطفالك بيستنوا منك ايه؟

ساعدي طفلك يقضي على الكسوف ويثق في نفسه


فإذا كنتي بحاجة لتقدمي إلى ابنك كل يوم حدوتة جديدة ومناسبة لوقتنا الحالي وللجيل الصاعد يمكنك ان تطلعي على "حكايات الجدة لولو"، واليك بعض من هذه الحكايات على موقع لهلوبة:

 

ريم والكورة الذهبية:

"إزيكم يا حبايبي <3 النهارده هاحكيلكم حدوتة جميلة أوي عن بنت اسمها ريم
ريم كانت دديما بتشتكي إنه كل حاجة مش عجباها، ديما تقول لمامتها إنه الأكل مش عاجبها، والبيت مش عاجبها وضيق، ولعبها مش عجباها .. وتقول لمامتها اشمعنى صاحبتي عندها تاب وأنا لأ..
وماما وبابا كانوا بيزعلوا منها لما بتقول الكلام ده وإنه مش بيعجبها الحاجات اللي بيعملوها ليها ..
في يوم من الأيام لما ريم كانت راجعة من المدرسة وكانت تعبانة فراحت تنام وحلمت حلم غريب أوووي!
حلمت إنها لما كانت راجعة من المدرسة لاقت كورة دهب في الشارع راحت أخدتها وروحت بيها وحطيتها في درج المكتب بتاعها، وبعدين ماما ندهت لها علشان تاكل .
راحت ريم عشان تاكل وأول ما مسكت المعلقة اتحولت وبقيت دهب!! فاستغربت أووي ليه المعلقة بقيت دهب وفرحت، بعدها مسكت الطبق اتحول بقى دهب برضو واتبسطت ريم وفهمت انه أي حاجة تمسكها هاتتحول دهب"
بس أول ما جت تمسك الأكل بتاعها اتحول هو كمان لدهب :O ريم خافت أوي وزعلت واكتشفت انها مش هاتعرف تاكل حاجة عشان بتتحول دهب مش بيتاكل .. وفضلت كده 3 أيام مش عارفة تاكل أو تذاكر أو تمسك أي حاجة لأنها بتتحول لدهب وفضلت تعيط تعييييط
فكرت ريم إنه الحكاية دي بدأت تحصل من ساعة ما لقيت الكورة الدهبية، راحت بسرعة فتحت درج المكتب وشالت الكورة وراميتها في الباسكت في الشارع .. ورجعت تاني على البيت ولاقت كل حاجة رجعت تاني زي ما كانت في الاول فعرفت تاكل وتلبس لببسها الحلو وعرفت تذاكر وتمسك كتبها وفرحت أوووي تاني..
وفجأة ريم صحيت من النوم واكتشفت انه كل اللي حصل كان حلم مخييف وراحت لباباها ومامتها وقالتلهم شكرا على كل الحاجات اللي بتملوها لي وبتشتروها لي أنا مش هاقول على حاجة تاني إنها وحشة
وتوتة توتة فرغت الحدوتة"

 

الأسد المحبوس:


"مين لسه صاحي يسمع حدتة النهارده؟؟؟
النهارده حدوتة جديدة عن الأسد المحبوس
كان ياما كان كان في راجل ماشي في غابة كبييرة، وهو ماشي لقى قفص جواه أسد بيعيط، الراجل سأل الأسد: "إنت بتعيط ليه؟"
الأسد قاله: "أنا محبوس في القفص بقالي 3 أيام ومأكلتش ولا شربت" :’(
فسأله الراجل طيب انت عايز إيه؟؟؟ الأسد قاله عايزك تفتح لي القفص..
الراجل قاله "بس أنا خايف لو فتحتلك القفص لحسن تاكلني"
راح الأسد قاله : "ده انت هاتساعدني، أوعدك إني مش هاكلك لو فتحته لي" ..
الراجل صدق كلام الأسد وفتح له القفص، فخرج الأسد من القفص، أول ما الأسد خرج من القفص قال للراجل أنا جعان بقالي 3 أيام ماكلتش وعايز أكلك!!
الراجل خاف أوووي وقال للأسد لا ماتكولنييييش أرجوووك، ضحك الأسد وقاله إزاي اسيب وجبة حلوة زيك ، فالراجل قاله طيب استنى تعالى نسأل 3 من الغابة ولو وافقوا كلني :(
فعدا عليهم أول واحد الكلب، الأسد سأل الكلب لو ياكل الراجل؟؟، فالكلب قاله أيوة كل الراجل عشان البشر كل ما يشوفوني يرموا عليا طوب ويعوروني
ففرح الأسد واستنوا الرأي التاني، فعدا عليهم حمار، سألوا الحمار لو حق الأسد ياكل الراجل، الحمار قال أيوة كله عشان البشر بيخلوني أشيل حاجات تقيلة أووي عليا وبيضربوني ..
الأسد اتبسط أكتر وقال للراجل فاضل رأي واحد بس وهاكلك :D
فاستنوا الحد التالت، فعدى عليهم الفييل، الراجل قال للفيل يا فيل الأسد عايز ياكلني وعايزين نعرف رأيك :(
فالفيل قال أنا مش هاقول رأيي إلا لما الأسد يروح القفص، فوافق الأيد وراح للقفص، راح الفيل قفل عليه القفص وحبسه تاني وقاله ده جزاءك عشان كنت عايز تاكل الراجل اللي ساعدك ولازم تفضل محبوس هنا عقابا ليك عشان بتئذي اللي بيساعدوك بدل ما بتشكرهم..
وفرح الراجل وقال للفيل شكرا أوي إنك ساعدتني ورجع قال للكلب والحمار ماتزعلوش من البشر وقال إنه عمره ما هايرمي طوبة على كلب أو يضرب حمار خاالص
وتوتة توتة فرغت الحدوتة حلوة ولا ملتوتة :D"

 

 


قولى رأيك

تابعنا علي فيسبوك