من الطفولة حتى الامومة..ادوار تألقت فيها لبلبة السينما المصرية

بواسطه إسراء صادق الثلاثاء , 14 نوفمبر 2017 ,4:24 م



لبلبة واسمها الحقيقي نينوشكا مانوج كوباليان نينوشكا مانوج كوباليان، لكن اسم الشهرة بتاعها كان خير معبر عن حالها، كانوا دايمًا بيقولوا على الشخص الشاطر الموهوب في اكتر من حاجة انه لبلب او لبلبة، وده فعلًا اللي كانت بتعمله لبلبة من اول ما ظهرت وهي طفلة ولغاية ما قدمت انضج ادوار الأم.
 
ويمكن ده اللي دفع الكاتب والمؤلف ابو السعود الابياري بالفعل لتسميتها بـ"لبلبة" لما لاحظ انها بتتكلم بسرعة، وقدمها بالاسم ده في اول افلامها في طفولتها وهو "حبيبتي سوسو" سنة 1951. 

وفي عيد ميلاد لبلبة السينما المصرية، لهلوبة جمعت ابرز ادوار تألقت فيهم من الطفولة لحد الامومة:  

- 17 فيلم في طفولتها على رأسهم "4 بنات وظابط": 
لبلبة قدمت الافلام دي وهي طفلة لكن بلسان واحدة كبيرة تقريبًا، حتى ادائها كان اقرب لاداء الكبار بس مخلوط بشقاوة زيادة، اول فيلم لها كان "حبيبتي سوسو" و ابرز افلامها في الطفولة "4 بنات وظابط" اللي لعبت فيه دور بنت شقية مش بتترك اخواتها الكبار في حالهم. 

ولبلة في طفولتها كمان برعت في فن التقليد، وكانت تقيم فقرة رئيسية في حفلات كبار الفنانين، وبتتقاضى عليها 10 جنيه في الحفل الواحد، ويمكن ده اللي حرمها من اللعب مع الاطفال اللي في سنها وتكوين الصداقات. 

- الزوجة المرحة:
وفي الحقيقة لم يحالفها الحظ، لبلبة قدمت دور الزوجة المرحلة في عدد كبير من افلامها، واشتهرت بردود الفعل غير المتوقعة المضحكة، زي دورها في فيلم "عصابة حمادة وتوتو" اللي مثلت فيه دور زوجة اضطرت للسرقة مع جوزها بطرق كوميدية لتلبية احتياجات حياتهم،  ودورها في فيلم "خلي بالك من جيرانك" اللي مثلت فيه دور زوجة مستهترة وعايزة تشتغل راقصة. 

اما في الحقيقة تزوجت لبلبة مرة واحدة فقط من الفنان حسن يوسف في اواخر السبعينيات، وعمرها كان 17 سنة، وكان بعد قصة حب قوية بينهم، بس الزواج لم يستمر طويلا، وقررت بعدها انها رافضة تجربة الزواج تاني بسبب ان معظم اللي تقدموا لخطبتها كانوا بيطلبوا اعتزالها الفن وده اللي كانت بترفضه في كل مرة.  

وخلال احد البرامج التليفزيونية قالت ان سبب طلاقها من الفنان حسن يوسف هو قبلة قبلها لها الفنان حسين فهمي اثناء تصوير احد مشاهد فيلم "بنت بديعة" بعد اصرار المخرج الراحل حسن الامام رغم عدم وجودها في السيناريو، واكملت انها اتصلت لاستأذان جوزها الفنان حسن يوسف ورفض بشكل قاطع، لكنها لم تستطع مخالفة رأي المخرج في اول تعاون بينهم وتم الطلاق بعدها بعدة اشهر. 

الأم الحازمة دائمًا: 
مؤخرًا كثرت ادوار لبلبة كأم، معظمها اتسم بالحزم زي دورها في فيلم "عريس من جهة امنية" لما مثلت أم الفنان شريف منير واللي كانت بتمثل فيه دور الأم شديدة الخوف على ابنها واللي بتتفنن في اختلاق المشاكل علشان تبوظ جوازته بسبب ابو عروسته.
وكمان دورها كأم في فيلم "عائلة ميكي" اللي جسدت فيه دور أم لـ4 اولاد وبنت، كانت بتفتش وراهم وبتتصدم بحقيقة كل واحد من ولادها. 

اما في الحياة الحقيقية لم تنجب لبلبة طوال حياتها، وقالت خلال احد اللقاءات ان المفروض ده كان حصل من بدري في وقته لكن الحظ لم يقابلها بالزوج المناسب، وانها في فترة الثورة كانت بتتمنى يكون عندها ابناء تقعد معاهم وتتحامى فيهم زي باقي الاسر. 


قولى رأيك

تابعنا علي فيسبوك