"الادمان انتشر ليه"..اعرفي واحمي ولادك المراهقين

بواسطه إسراء صادق السبت , 7 يوليو 2018 ,9:49 ص

المخدرات


بسبب ظروف اجتماعية او اقتصادية او حتى رغبة في التجربة وتقليد الاصدقاء او اخفاق في التربية من الممكن ان اي شخص يقع في فخ ادمان المخدرات في اي سن بس الاغلبية بيكون في سن المراهقة. 
 
ومؤخرًا انتشرت جرايم كتير باسم المخدرات وبشكل ملحوظ، ويمكن ده اللي جعل رواد مواقع التواصل الاجتماعي يفعلوا هاشتاج "المخدرات انتشرت ليه". 
 
من تدوينات الهاشتاج: "الاهل ثم الاهل طبعا الي ادوا الفرصه لاولادهم"، "عشان احنا شعب يقدس كل ما هو مزاجي"، "الفراغ وعدم تحقيق أي هدف ف الحياه". 
 

ولان كتير من التدوينات كانت تخص الاهل سواء بالخطأ في التربية او اهمالهم او البعد عنهم، احنا في لهلوبة بنقدملك بعض النصايح علشان تقدري تحمي ولادك خاصة في فترة المراهقة واللي اشارت اخر الاحصاءات ان معظم المدمنين بدأوا في ادمانهم لاي نوع من المخدرات في السن ده، ودي بعض النصايح:  
 

1- املأي فراغ ابنك او بنتك المراهقة:

حاولي ديمًا تكوني حاضرة في حياتهم، وخصوصًا في فترة الاجازات بعد انتهاء الدراسة، بلاش تعتبريها اجازة من دورك كأم علشان مفيش مزاكرة، التربية مش كلها اكل وشرب ومزاكرة، في كمان انك تصاحبيهم وتسمعي منهم وتعوديهم على الكلام معاكي بدون خوف، حاولي ديمًا توصلي لحلول وسط في طلباتهم بدل الرفض بدون نقاش. 
 

2- التعلق برياضة مفيدة او هواية شايف نفسه فيها: 

من صغره حاولي تساعديه يجرب كذا نوع من الرياضة لغاية ما يوصل للعبة اللي عايز يكمل فيها، التعلق بنوع معين منها بتربي حالة نفسية صحية عند الطفل ولغاية ما يعدي بمرحلة المراهقة ويتجاوزها للشباب ده غير فوايدها الصحية، الحالة دي بتجعله ديمًا عايز يبعد نفسه عن اي حاجة ممكن تخل بصحته وتعطله عن ممارسة الرياضة اللي بيحيها، كمان بتشغل وقت كبير بدل ما يكون عنده فراغ ممكن يدفعه يفكر في حاجات ضارة زي المخدرات، والشيء نفسه بالنسبة للهوايات الفنية اللي ممكن يلاقي فيها نفسه. 
 

3- النظام الغذائي: 

احرصي ان تاكلي اولادك طعام صحي في فترة المراهقة، وحاولي تمنعيهم من تناول بعض المواد زي السكريات اللي ممكن تحفز الجسم على سرعة الاستجابة لادمان بعض مواد المخدرات، يفضل تناولها بحرص بس بلاش تعملي ده بالامر، اتناقشي وحاولي تجعليه هو اللي يبعد عنها بمزاجه. 
ممكن كمان تطلبي من بنتك تساعدك في اعداد الوجبات الصحية علشان تحب الموضوع لما تكون هي اللي بتعمل ده بنفسها.
 

4- كوني صديقة لاولادك: 

دور الصديق في حياة اولادك المراهقين افضل من دور المفتش، بلاش ابنك او بنتك يحسوا انك جاسوس عليهم بتفتشي ديمًا وراهم او في اغراضهم، ده اللي بيجعلهم يبحثوا عن بدايل اقربها بيبقى السجاير وبعدها بيجي الاخطر، من الافضل تكون العلاقة بينكم علاقة صداقة، خصصي وقت للنقاش بينكم واجعليهم هم اللي يبقوا عايزين يحكوا. 
 

5- اخيرا والاهم.. القرب من دينهم:

حاولي تحثي اولادك من صغرهم وخاصة في سن المراهقة على التقرب من دينهم واتباع اساسيات تعاليمه، ده بيحميهم من حاجات كتير. 
 
- تعملي ايه لو اكتشفتي انه ابنك المراهق او بنتك بالفعل وقع في فخ الادمان؟ 
 
- اول حاجة ابعدي عن العنف لانه في الوقت ده بتبقى نتايجه عكسية، الافضل تلجأي لاستشارة طبيب نفسي لمساعدتك على ايجاد حل مناسب للتعامل مع الحالة بشكل يناسب نفسيته وطبعه.
 
-  لو الادمان في درجة متقدمة، يبقى لابد من اللجوء لمصحات ادمان متخصصة في علاج حالات التعاطي للمخدرات او الكحول او غيره، وممكن يستدعي الامر حجزه لفترة في المصحة.
 
- بعد التعافي لازم تكوني محضرة شكل جديد للتعامل مع ابنك او بنتك المتعافيين من الادمان، اسألي مختصين لو مش عارفة بس لازم يبقى فيه خطة تجعلك قريبة منه وتساعده في عدم الانتكاسة او العودة للطريق ده مرة تانية. 


قولى رأيك

تابعنا علي فيسبوك