للبنات.. نصايح لاختيار ملابس تناسب شكل جسمك وتداري عيوبه

بواسطه روضة إبراهيم | الخميس , 1 فبراير 2018 ,10:12 ص

للبنات نصايح لاختيار ملابس تناسب شكل جسمك وتداري عيوبه


لازم كل بنت تعرف ايه الاستايل اللي بيليق على شكل جسمها، علشان تعرف تختار لبسها بطريقة يجعلها جذابة وواثقة في نفسها وانيقة طول الوقت حتى لو كان عندها مشاكل وديفوهات في جسمها، زي ظهور منطقة البطن، او ان جسمها مليان او رفيع بزيادة، او اذا كانت طويلة او قصيرة جدًا، وهكذا، دي كلها مشاكل ممكن نتغلب عليها بالملابس ولكن لازم تعرف كل ست ايه القطع المناسبة لشكلها علشان تطل بها على المجتمع وفي نفس الوقت تكون مرتاحة فيه.
وفي برنامج طهي وبس"، اللي بتقدمه المذيعة رضوى الشربيني، على فضائية "cbc"، استضافت الاستايلست المعروف ،سعيد رمزي، علشان يعرف كل سيدة قواعد اختيار الملابس بطريقة تناسب جسم كل سيدة وتداري العيوب.

نصايح في اختيار الملابس علشان نداري بيها عيوب الجسم:

1- لو كنتي عريضة من الاكتاف ابعدي تمامًا عن فكرة لبس القطع المفتوحة من فوق على شكل "v"، او الفساتين الكب، لانها بتبين عرضك من فوق جدًا، ويفضل لبس قطع الـ"ون شولدر" او فستان بحملات علشان تكسري العرض اللي في منطقة الكتاف.
2- لو كنتي سيدة رفيعة من منطقة الصدر والاكتاف، ممكن تلبسي وتنوعي بين كل القطع مختلفة الشكل، بتكون مناسبة جدًا.
3- لو سيدة عريضة من الجناب او عندها بطن بارزة، هنا يفضل انك تبعدي عن لبس حزام في المنطقة دي علشان بتظهر الديفوهات، وكمان يفضل انك تتجنبي الملابس الضيقة من المنطقة دي علشان تبعدي عن لفت نظر الناس للمشكلة اللي عندك، او تلبسي "كورسيه".
4- لو كنتي بتتميزي برفع في منطقة الوسط والبطن، هنا ممكن تلبسي حزام، او تعتمدي على لبس العديد من القطع علشان يكون جسمك متناسق اكتر.
5- لو كنتي سيدة بتعاني ان عندها ارداف كبيرة ورجل عريضة، ابعدي تمامًا عن لبس الجيب او الفساتين القصيرة، بتكون غير جذابة بالمرة، واتجهي للبس البناطيل الوسعة، او الفساتين الطويلة، ولو نفسك تلبسي قطعة قصيرة ممكن تلبسي بوط طويل من تحت.
6- لو كنتي بتعاني ان دراعك كبير، ابعدي عن لبس الفساتين او البلوزات الكت، ولو عاوزه تلبسيها مرة يفضل انك تضعي شال يغطي دراعك شوية، ويفضل انك تلبسي بلوزات شيفون او دانتيل علشان تداري المنطقة دي بشكل شيك.
7- لو كنتي قصيرة يفضل انك تقسمي جسمك لعدة اجزاء علشان يعطيكي طول، يعني البسي بلوزة وبعدين حزام رفيع على الوسط ومن تحت بنطلون او جيب، ويفضل للقصيرين انهم يلبسوا فساتين قصيرة لحد الركبة علشان يظهر منطقة الصدر والوسط والرجل وده بيجعل البنت تظهر طويلة، ويفضل تلبس جزمة عالية، وشعرك يكون فوليوم علشان يعطي مساحة للوجه.
8- البنات الطويلة متاح لها تلبس اي قطع، ولكن يفضل انك تبعدي عن الجيب او الفساتين القصيرة جدًا علشان تتجنبي ان رجلك تبان طويلة جدًا.
9- بالنسبة للبناطيل الـ"هاي ويست" يفضل تلبسه الطويلة مش القصيرة، علشان بيظهر طول القصيرة وبيكون مش جذاب بالمرة.
 
 
موضوعات متعلقة:


قولى رأيك

تابعنا علي فيسبوك