ازاي تربي طفل يتمتع بصحة نفسية

بواسطه علياء المحمدى | الإثنين , 6 نوفمبر 2017 ,10:02 ص

ازاي تربي طفل يتمتع بصحة نفسية


 

تربية الطفل الهدف الاساسي منها هو تخريج اجيال بتتمتع بصحة نفسية سوية ويكونوا ناجحين اجتماعيا وعمليًا، ولان الموضوع مش سهل خصوصا ان الاهل بيواجهوا مواقف جديدة لاول مرة مع اولادهم وبيتعلموا منهم ساعات، لهلوبة حبت تسهل على كل أم التربية وتقولها مجموعة خطوط عريضة تضمن بيهم ان طفلها يبقى سوي نفسيا وبيتمتع بمشاعر وافكار سليمة.
 
- اعملي اقصى جهدك علشان يكون البيت هادي وصحي ومناسب لوجود طفل، بمعنى ان يكون في جو من التفاهم والمحبة وكمان اهتمام بالصحة البدنية والنفسية.
 
- اهتمي بالتعرف على المراحل العمرية للطفل ونموه العقلي علشان تقدري تتوقعي التطور المظبوط له لا اكتر ولا اقل وبالتالي لا تطلبي منه اكتر من قدراته او تحطي منها.
 
- شجعي طفلك على التعبير عن مشاعره بحرية من اول الاحساس بالحب والسعادة حتى مشاعر الغضب والحزن والغيرة والقلق، المهم يكون التعبير في حدود المعقول دون عنف مبالغ فيه.
 
- حافظي على الاحترام المتبادل بينك وبين طفلك، اهتمي ان صوتك يفضل واطي قدامه حتى في اوقات الغضب علشان يتعلم يعبر عن رأيه من غير صوت عالي ودايمًا اهتمي يكون في حوار بينك وبين طفلك.
 
- اسمعي من طفلك بصبر واهتمام، شجعيه على انه يسأل ويتكلم ده بيعمل منه شخصية واثقة في نفسها وحاسة باهميتها.
 
- وفري لطفلك جو من الثقة والراحة، طمنيه ان سره معاكي في امان وانه ممكن يحكي لكي اي حاجة هو مكسوف منها وانتي تريحيه، ودايمًا ركزي على الجوانب الايجابية في شخصيته.
 
- دايمًا كوني مثال جيد للطفل وقارني طريقة تعاملك مع المشكلات بطريقته ولو حسيتي ان عندك مشكلة يبقى توقعي تلاقي طفلك عنده نفس المشكلة، اوجدي للطفل مبررات بدون مبالغة.
 
- شجعي الطفل يمارس هواياته وينمي مواهبه، واحتفلي به لما يعمل حاجة حلوة، بلاش تتهميه انه بيقلد او تقارنيه بغيره.
 
- احرصي جدا انك تقضي وقت كافي مع طفلك وتتكلمي معاه وتلعبي معاه، اقضي معاه الوقت زي ما يحب.
 
- شجعي طفلك ان يكون له مستقل وله رأيه وقراراته، اجعليه يتعرف على قيمته الحقيقية بنفسه من خلال قدراته على المواجهة لوحده.
 
- اسمحي للطفل يتعلم من اخطائه بدل ما توجهيه طول الوقت.
 
- حبي طفلك وعبري له عن حبك ده بكل طاقتك، علميه يعتذر ويساعد ويبقى صبور متسامح لان القيم دي مفيش حد يقدر يعلمها له غيرك.
 
- لا تتوقعي المثالية من نفسك ولا من طفلك لان الامومة مش مهمة سهلة.
 
 
موضوعات متعلقة:


قولى رأيك

تابعنا علي فيسبوك