صابرين تنتقد حلا شيحة: موقف حلا كان مريب!

بواسطه هند جمال | الأربعاء , 28 يوليو 2021 ,11:33 ص

صابرين تنتقد حلا شيحة موقف حلا كان مريب


كشفت الفنانة صابرين خلال استضافتها ببرنامج "كلمة أخيرة" الذي تقدمه الإعلامية لميس الحديدي على شاشة قناة "أون" عن رأيها في موقف الفنانة حلا شيحة الأخير، بعدما هاجمت فريق عمل فيلمها "مش أنا" وعلى رأسهم النجم تامر حسني بطل الفيلم، عقب عرض الأغنية الدعائية للفيلم والتي شهد الكليب الخاص بها بعض المشاهد الرومانسية المأخوذة من سياق العمل.

وحول ذلك قالت صابرين: "موقف الفنانة حلا شيحة كان مريب، شوفتها لما اتنقبت وفكيت واتحجبت وجمعتني بيها مناسبة، بس أخر حاجة عملتها حسيت إن في حاجة غلط، وبعدين لما رجعت عملت مسلسل خيانة عهد".

وأضافت: "حلا ممكن تكون اتلخبطت ونسيت التمثيل، وكل واحد فينا بيجي عليه وقت بيتخبط، بس اللي عملته أوفر شوية، وأكثر حاجة أزعجتني العلاقة بينها وبين باباها، أنا بالنسبة لي هي تعمل اللي عايزاه وحرة ودي حياتها ولا أجرؤ أعلق، بس اللي حصل مع أبوها ضايقني، بشوف إن الأب والأم استوب خط مش أحمر، ملتهب".

وكانت تصريحات متبادلة قد أطلقتها حلا ووالدها أحمد شيحة، بعدما أعرب الأخير عن رأيه في موقف ابنته الأخير من الفن وهجومها على بعض زملائها، مشيرًا إلى دهشته من حديث حلا وتبرؤها من مشاركتها من فيلم "مش أنا" الذي يعرض حاليًا بجميع دور العرض، لترد حلا بدورها على تصريحات والدها.

كما تحدثت صابرين عن موقفها مع الحجاب وارتدائه ثم خلعه قائلة: "الحجاب كان في حالة انفصال في البيت ولخبطة، أهم حاجة الواحد يعمل اللي بيحبه بصدق، ولما قررت أفك الحجاب قولت أنا مش بعمل الصح أوي وليه أبقى بوشين ولا 3 وشوش، وليه مواربة باب".

وأضافت: "الناس بتهاجمني عشان الباروكة، وأنا لما كنت بقعد مع نفسي كنت بقول أهو الباروكة أحسن ما أعمل حاجة تانية، بعدين قولت لنفسي أنا مكنتش بلبس حاجة والناس كانت بتشيد باحترام الأدوار، والناس ابتدت تعلق الشماعة ليا، وقولت يعني إيه لو كسبت العالم وخسرت نفسي".

وتابعت: "وحسيت إني حابة نفسي أكثر وفي تصالح والعلاقة مع ربنا بيني وبينه، ومحدش بيسألني أنت صليتي ولا لأ وصومتي ولا لأ، ومحدش بيعرف واجباتك في السر".

 وأكملت صابرين: "دايما كنت بقول اللي هينزل معايا القبر يحاسبني، وكان في تعليقات ناس تقولي إحنا بنحبك في الله وبننصحك وأنا بحب ده وبحترمه وفي ناس بقى تخصص تهزيق وبهدلة، وكانوا لجان وبيكون باين مين بينصح بمحبة ومين بيشوط وخلاص"

موضوعات متعلقة:

شاهد بالصور نجلي الفنانة صابرين بعد أن أصبحا شابين يافعين

شاهد أحدث ظهور لحلا شيحة بالحجاب

اعترافات الفنانة صابرين عن الحجاب تحدث ضجة بمواقع التواصل الاجتماعي ما الحكاية؟

صابرين تحدث ضجة بمواقع التواصل الاجتماعي بأول لايف من منزلها


قولى رأيك

تابعنا علي فيسبوك