حلقة في ودنك.. دليل الراجل المصري في التثبيت

بواسطه إسراء صادق | الخميس , 19 أكتوبر 2017 ,9:48 ص

حلقة في ودنك دليل الراجل المصري في التثبيت


بعد وصلة طويلة من التريقة على "اكليشيهات" البنات في العلاقات العاطفية وقد ايه كلهم بيقولوا نفس الكلام في نفس المواقف وده طبعًا علشان من وجهة نظر الرجالة كلهم نفس الدماغ وعاشقات للنكد  فطبيعي لما بيتسألوا "مالك" الاجابة تكون "مفيش" أو "لو بتحبني هتعرف لوحدك" وده طبعًا غير ان "الاهتمام أصلا ما بيطلبش" زي ما احنا عارفين، فكان لازم البنات تركز شوية وتخرج عن صمتها وتكشف اللي كانوا ساكتين عنه مراعاة لشعور الرجالة.  

البنات كمان بدأوا يحكوا لبعض وينشروا على مواقع التواصل الاجتماعي عن "اكلشيهات" الشباب والرجالة في العلاقات العاطفية، لكن علشان نديهم حقهم كانت الجمل اللي بيكرروها وبيرددوها في مستوى أعلى كتير عن البنات يعني في الحقيقة يتحسدوا على الابداع ويستاهلوا يتعمل ليهم قائمة، وده فعلا اللي حصل لحد ما بقى "تريند" على "تويتر" بعنوان #تويت_كأنك_راجل_مصري.

لهلوبة قررت تجمعلك أشهر جمل ودخلات الرجالة علشان كل اللهلوبات يبقوا مركزين.. ودلوقتي نسيبك مع "دليل الراجل المصري في التثبيت": 

1- شفت بنات كتير بس انتي بالذات فيكي حاجة شدتني: 
دي الشاب بيدخل بيها على البنت اللي شايفة نفسها مختلفة ومش بتدي اهتمام لحد فلازم يدخلها من المدخل بتاعتها.

2- احنا زي بعض في حاجات كتير: 
دي جملة لجذب الطرف الآخر بالوهم، يعني "ياه احنا لما بنعطش بنشرب زي بعض" غريبة جدا.

3- أنا متجوز بس مش بحب مراتي ومكمل معاها عشان الولاد: 
ودي بيستخدمها الراجل المتجوز اللي مش قادر يبطل عك واتخنق من الجواز، وعايز يجدد شبابه بعيد عن مسؤلية الجواز والأولاد والبيت. 

4- يا بت انتي مراتي أو انتي بتاعتي  وأحيانًا الأمر بيتطور لـ "انتي أم ولادي": 
بمنتهى العشم والتلقائية الراجل  بيحاول يقنع  البنت اللي يدوب مرتبط بيها من كم يوم أنها "بتاعته" كأنها شيء مثلا أو انها  زي مراته بالظبط وأحيانًا بيوهمها انها "أم عياله" وده بيخلينا نسأل هو بعد ما بيفركشوا العيال دول بيروحوا فين!

5- أنا عمري ما قلت الكلام ده لحد غيرك: 
غالبًا الجملة دي بتكون ليها تكملة مش بتتقال، "عمري ما قولت الكلام ده غير للـ 20 اللي قبلك بس يا حبيبتي".  

6- انتي تستاهلي حد أحسن مني: 
ودي بتكون نهاية المطاف، فن الهروب بشياكة:  

7- اطلعي من دماغي الساعة دي: 
دي طبعًا بتكون بعد الجواز، والعلماء عجزوا عن تحديد  الساعة دي في الحقيقة لأن الراجل بيقولها في كل ساعات اليوم. 

8- شايفة الستات يا هانم: 
ودي بتتقال غالبا بعد سنة من الجواز على الأقل، الست بتكون نفسها تقول ما انا كنت من الستات دول من سنة.  

9- نيمي العيال من غير صوت عندي شغل الصبح:
وده طبعا على أساس أنهم ولادها لوحدها أو ان هي فاضية ووقتها مش ثمين زيه. 

10- أنتي اتغيرتي بعد الجواز:
أخيرًا وليس بآخر.. الجملة دي بتكون الشماعة اللي الراجل بيبرر بيها كل الجمل اللي قبلها. 



بعد ما بقى معاكي دليل تثبيت الراجل المصري، لازم نعترف ان مش كل الرجالة كده ولا كل البنات والستات كمان، وان في الآخر هما الاتنين بيكملوا بعض في الحياة من غير أي شك.


قولى رأيك

تابعنا علي فيسبوك