ازاي تستمتعي بأكلك المفضل.. وتعدي الشتا من غير زيادة وزن

بواسطه إسراء صادق | الثلاثاء , 24 أكتوبر 2017 ,9:26 ص

ازاي تستمتعي بأكلك المفضل وتعدي الشتا من غير زيادة وزن


فوبيا زيادة الوزن في فصل الشتا، شبح بيطارد معظم الستات والبنات، وده نظرًا لبرودة الجسم اللي بطبيعة الحال بتجوعك أسرع عن الأيام العادية ده غير حاجتك لأكلات معينة بتساعد على التدفئة، بس ده كله بيبقى مع خوفك من زيادة الوزن اللي بنتفاجئ بيها لما الشتا يخلص وتطلعي هدومك الصيفي، وساعتها الندم مش بينفعك لما تلاقيها ضاقت عليكي، عشان كده لهلوبة هتقولك خطوات تساعدك تستمتعي بأكلك المفضل وتدفي، وفي نفس الوقت تعدي الشتا من غير زيادة في الوزن بقدر الامكان:  

1- الأكل البيتي:

بدل ما تكلفي نفسك وتزودي وزنك من الأكل الجاهز والوجبات السريعة، اعتمدي أكتر على الطبخ في البيت، لأن ده بيساعدك تتحكمي في كميات الأكل ونوعيته اللي يفضل تكون اختيارات صحية، ومش بس الوجبات الأساسية لكن كمان معاجين التوابل والمقبلات الشهيرة واللي أغلب منتجاتها بتحتوي على نسب عالية من السكريات والدهون والمواد الحافظة الضارة، لو عملتيها في البيت بتتفادي كل ده وكمان بتكون من اختراعك تقدري تضيفي عليها اللمسة بتاعتك.

2- التحكم في نسبة البروتين والكربوهيدرات:

في الشتاء غالبا كلنا بنميل لوجبات تحسسنا بالدفا واللي ديمًا بتحتوي على نسبة عالية من الكربوهيدرات والدهون مع قلة في الحركة والرياضة وبيبقى من الطبيعي تحصل زيادة في الوزن، وعشان نتجنبها لازم نعمل توازن بين المكونات في أكلنا وأول حاجة نبدأ بيها الاتجاه للبروتينات الخالية من الدهون زي البيض، الفراخ، الزبادي، البقوليات والسمك وغيره.

وتاني حاجة استبدال المقبلات وأطعمة التسلية بـ"سناك" صحي ومفيد يشعرنا بالشبع من غير ما يسبب تراكم في الدهون زي المكسرات والبذور.

وتالت حاجة استبدال الزيوت الدهنية المصنعة بأخرى طبيعية وخفيفة وأقل في نسبة الدهون زي زيت الزيتون والأفوكادو ومعجون الطحين والبذور الخام.

3- التركيز على الألياف:

صحيح الأطعمنة اللي بتحتوي على الألياف من ديمًا بتكون جذابة لكنها ضرورية جدًا عشان الأمعاء تشتغل بشكل طبيعي، فلازم نهتم بيها جنب أكلنا اللي بنحبه، وبتكون موجودة في أطعمة زي الخضار والفاكهة والبوقوليات وكل البذور والمكسرات.

والخبراء بينصحوا ديمًا بتناول الأطعمة المحتوية على الألياف بمعدل 30 جرام يوميًا.

4- خضروات جنب الوجبات المفضلة:

التجارب بتقول أن مش شرط تمتنع عن الأكل اللي بتحبه نهائيًا علشان تمشي على نظام غذائي صحي، لكن على الأقل تاكله بكميات معتدلة وجنبه بشكل أساسي نوع من الخضروات في كل وجبة، يعني مفيش مانع تاكل كمية قليلة من المكرونة اللذيذة بالكريمة بس كمية قليلة جنبها طبق سلطة كبير.

5- التخطيط المسبق:

من الأسباب الرئيسية اللي بتجعلنا نفكر في الوجبات السريعة هي مفاجئتنا أن "مفيش أكل" للوجبة المقبلين عليها سواء فطار أو غداء أو عشاء، وبالتالي نقرر اللجوء لأسهل وأقرب حاجة قدامنا، وعلشان نتغلب على ده لازم من بليل نحضر اللي هناكله الصبح ونختار أنواع صحية ولذيذة، كمان واحنا بنجهز الغدا نعمل حسابنا في كمية زيادة من السلطة على سبيل المثال للعشاء، وبكده عن نفسنا فرصة التفكير في الأكل السهل غير الصحي.


6- إيجاد حيل للتغلب على صعوبة الحركة في البرد:

صحيح كلنا في الشتا بنكون غير قادرين نخرج بره البيت علشان نمارس الرياضة بشكل واسع أو حتى نتحرك كتير، لكن في طرق وحيل ممكن نتغلب بيها على ده لأن الحركة شيء أساسي في يومك، زي مثلا انك تجربي رياضة اليوجا وانتي قاعدة في البيت، أو لو تقدري توفري "مشاية كهربائية" في البيت، أو انك تعومي في حمام سباحة أو حتى بانيو الاستحمام في حمام منزلك.

7- شرب الميه والمداومة على رطوبة الجسم:

شرب الميه من أكتر الحاجات اللي ممكن ننساها في الشتاء بسبب شعورنا بالبرد مع الحركة القليلة والعرق القليل، لكن في الحقيقة هو مهم جدا زي ما هو مهم في الصيف، والخبراء بينصحوا بشرب من 1.5 لـ 2 لتر يوميًا لضمان تمثيل غذائي سليم للجسم.

8- الأكل بالراحة..مفيش حد بيجري ورانا:

كتير مننا متعودين ياكلوا بسرعة واندفاع خصوصًا في الشتاء معتقدين ان ده ممكن يساعدهم يتدفوا أسرع، لكن دي مش حقيقة والحقيقي هو أن الأكل بسرعة بسبب مشكلات هضمية كتيرة وكمان بيأدي للشعور بالجوع بعد مدة قليلة من الانتهاء من الوجية، وعلى كده الأفضل أننا ناكل بهدوء.

كمان الأكل بالراحة مش بس بيسمحلك تستمتعي بنكهات الأكل المختلفة وتميزي بينها بس، لأ ده كمان بيساعد على الهضم بشكل أصح.

9- البحث عن بدايل صحية:

كلنا بنحب الأكل اللذيذ زي الشوكولاتة والحلوى والمكرونة بالكريمة بس عارفين انهم بسببوا زيادة سريعة جدا في الوزن، بس مفيش مشكلة ملهاش حل، كل الأكلات دي ليها بدائل صحية. مثلا لو حبينا ناكل حلويات ممكن نبدلها بالفواكه اللذيذة ولو عايزين بديل للكريمة الدسمة ممكن نستخدم الزبادي المكثف، وكوني عارفة ان مفيش حاجة ملهاش بديل صحي.

10-  مفيش أكل قدام التليفزيون:

حاولى بقدر الإمكان تبعدي عن تناول وجباتك الرئيسية أمام التيفزيون، وده لان الدراسات اثبتت ان تناول الطعام أمام التيفزيون بيجعلك تتناولين الطعام دون وعي بنوعيته أو كميته، ولو الموضوع اضطراري خاصة في الشتاء حاولي تحددي كمية معينة وانواع محددة من الطعام أمامك.

11- الاتساق والاعتدال:

كلنا بنتمنى نوصل للنتائج المثالية والحفاظ على كل العادات الصحية، بس ده مش معناه اننا نمتنع عن كل حاجة مرة واحدة طول الشتاء وعن كل الوجبات اللذيذة والسريعة ولا اننا نتمرن طول الأسبوع، لكن الأهم هو الاعتدال ومعرفة المطلوب لكل جسم، عالجي نفسك بالتوازن والاعتدال وعدم الإفراط في أي شيء. 


قولى رأيك

تابعنا علي فيسبوك