5 اسباب تدفعك للنوم جنب رضيعك

بواسطه شيرين مصطفى | الأربعاء , 9 أغسطس 2017 ,11:37 ص

5 اسباب تدفعك للنوم جنب رضيعك


زمان كانت الامهات بتنيم اطفالها جنبها من بداية ميلادهم ولحد فترة كبيرة من الرضاعة، وبعدين اشتهر ان ده تصرف مش سليم علشان بيكون صعب يتعود بعد كده على النوم لوحده، الا ان احد الدراسات قالت ان في 5 فوايد من نوم الفل الرضيع بجوار والدته، زي  انه بيحس بالامان وقلقله بيقل وهو نايم، ولهلوبة هتقولك على اسباب تجعلك تنامي جنبه.

 

1- انتظام دقات قلب الطفل:

في دراسة حديثة رصدت رد فعل الطفل الرضيع لما بيقرب منه حد غريب بعدين الاب والام، شاشات المختبر المتصلة بجسمه وضحت ان نبضه بينتظم وبيماثل معدل ضربات قلب الأم لما بتقرب منه، على عكس لما الغرباء قربوا منه.

وأوضحت ان الأطفال، اللي بيناموا جنب أمهاتهم بيتمتعوا بما يسمى "الاثارة الواقية"، وهي حالة من النوم تمكنهم من الاستيقاظ بسهولة كبيرة لوكانت صحتهم في خطر، زي وجود صعوبات في التنفس، كمان درجة حرارة جسمهم بتكون مستقرة مقارنة بالأطفال اللي بيناموا لوحدهم، ده معناه ان الرضيع بينام بشكل آمن من الناحية الفسيولوجية بجانب الأم .

 

2- الحفاظ على سلامة الرضيع:

لو كان طفلك بينام جنبك او قريب منك، فطبيعي تحسي بيه لو كان بيعاني من صعوبة في التنفس، او اصابته شرقة او مغص او اتقلب ومش عارف يساعد نفسه، وبالتالي بتحميه من مخاطر كتيرة.

وحسب ابحاث اجراها الدكتور جيمس ماكينا، مدير مختبر الام والطفل بجامعة نوتردام، ان الامهات اللي بتنيم اطفالها جنبها بيكونوا حريصين وعندهم وعي بسلامة اطفالهم واسرع في الشعور بيهم، ولو عانى من حاجة اثناء نومه قريب منها هتعرف تتصرف وتنقذه بسرعة، وسماه "وئام النوم الليلي".

 

3- سهولة الرضاعة الطبيعية:

لانهم بيحتاجوا ليها بالليل، خصوصًا خلال الاسابيع الاولى بعد الولادة، ووجود الرضيع بجانب الام خلال الوقت ده بيجعل الرضاعة سهلة ومريحة للطرفين وبيعمق الترابط بينهم، وبيحافظ على ادرار الحليب بشكل جيد، كمان بيمنع الام من الاكتئاب.

 

4- الحصول على المزيد من النوم:

كشف باحثون في كلية التمريض بجامعة ولاية تينسي الشرقية، انه على الرغم من ان الاطفال اللي بيرضعوا طبيعي بيناموا بشكل اقل من غيرهم المعتمدين على الحليب الصناعي، الا ان امهاتهم بيناموا اكتر، لانهم بيلاقوا اوضاع مريحة للرضاعة الطبيعية تساعدها تنام بشكل افضل، وبتكون مطمنة لوجود رضيعها جنبها، لحد لما يصحيها ببكائه لانه عايز يرضع.

 

5- الاستمتاع بالامومة:

النوم مع طفلك وهو حاضنك او واضع ايده على رقبتك، من افضل الحاجات اللي ممكن تحصلك، فكل ام بتستمع بالنوم المشترك مع طفلها الصغير بجانب ريحته وانفاسه وملامحة البريئة، لحد لما يكبر ويطلب ينام لوحده في أوضة منفصلة.

 

موضوعات متعلقة:

حقيقة ضرر عين الطفل الرضيع من الضوء القوي

نصائح لتنظم نوم رضيعك في رمضان


قولى رأيك

تابعنا علي فيسبوك