غلطات الليل هتزود وزنك اتجنبيها

بواسطه علياء المحمدى | الإثنين , 4 يونيو 2018 ,2:23 م

غلطات الليل هتزود وزنك اتجنبيها


غلطات الليل هتزود وزنك اتجنبيها، الأكل بالليل مش هو العادة الغلط الوحيدة اللي بنعملها وبتتسبب في زيادة وزننا، موقع Bright side اكتشف غلطات تانية كتير بنعملها وإحنا مش واخدين بالنا بتبقى سبب في فشل أي دايت بنعمله أو محاولة للتخسيس.

- عدم النوم كفاية:

الجسم بيحتاج على الأقل 8 ساعات نوم وإلا الميتابوليزم بيتأثر والحرق بيقل لا إراديا وبالتالي الجسم مبيخسش ومجهوده بيبقى أقل.

- الأكل كتير في العشا:

العشا في العموم مش غلط المهم متكترش كمية الاكل حتى لو أكل صحي.

- الأكل قبل النوم مباشرة:

ده بيسبب تكوين خلايا دهنية كتير في الجسم، الأكل لازم يبقى قبل النوم بساعة ونص أو ساعتين على الأقل علشان كمان ميعملش مشاكل في الهضم.

- أكل مقليات:

المقليات بتزود الخلايا الدهنية في الجسم وبالتالي أكلها بالليل لما الجسم بيبقى مش مستعد يبذل أي مجهود غلط جدا.

- أكلات حارة:

رغم إن الأكل الحراق بيزود الحرق في الجسم، لكن أكله بالليل بيصعب الهضم وبيخلي النوم اصعب، كل أكل حراق براحتك بس مش بالليل.

- أكل نشويات:

النشويات هتمدك بطاقة مش هتستخدمها قبل النوم وبالتالي كل ده هيتخزن في الجسم، الأحسن نستبدلها بأكلات صحية ونباتية.

- أكل الحلويات بالليل:

النشويات والسكريات دي بتتحول لدهون مباشرة في الجسم، بدل الحلويات بفواكه بالليل وخلي الحلو الصبح علشان تقدر تحرقه.

- أكل بعد العشا:

بعد وجبة العشا في ناس بتاكل فشار أو أي سناك كوجبة خفيفة، الأكل الزيادة ده غلط، المفروض الوجبة بالليل تكون 200 كالوري مش أكتر.

- الهروب من العشا:

في ناس علشان تتجنب الغلطات دي بتسيب وجبة العشا تماما، ده غلط على الجسم وبيخلي الجسم يجوع أكتر وبيخسر عضلات كمان، فلو خايف من العشا او معندكش وقت للاكل خد ثمرة فاكهة على الأقل.

- شرب الكافيين:

الكافيين هيصعب النوم وكمان السعرات الحرارية في السكر واللبن لو شربناه بلبن هتتخزن في الجسم.

- استخدام الموبايل:

الاشعة اللي طالعة من الاجهزة دي بتأثر على المخ وبتخلي النوم مش صحي وبالتالي بتأثر على الحرق في الجسم.

- النوم متأخر:

النوم الصبح مبيعوضش عن نوم بالليل فحتى لو نمت 8 ساعات معظمهم الصبح بعد طلوع الشمس الجسم مبياخدش راحته وأول حاجة هتفكر فيها بعد الصحيان هي الأكل. 


قولى رأيك

تابعنا علي فيسبوك