شقيق ياسمين عبد العزيز يقطع صلته بها: ربنا يوفقك وينجحك.. من النهاردة اعتبريني بره حياتك

أثار الفنان وائل عبد العزيز، شقيق الفنان الكبيرة ياسمين عبد العزيز، الكثير من الجدل، في الساعات القليلة الماضية، بعد مهاجمته لشقيقته على السوشيال ميديا أمام الجميع، بسبب ارتباطها عاطفيًا بالفنان أحمد العوضي، الذي يصغرها بحوالي 10 أعوام على حد قوله.

وبعدما هاجم الفنان وائل عبد العزيز شقيقته ياسمين، تعرض لهجوم شديد من الجميع مما جعله يحذف هذا المنشور، وخرج من جديد في مقطع فيديو ليوضح بداية الخلاف ولماذا لجأ للحديث على صفحته على موقع التواصل الاجتماعي "فيس بوك".

وقال وائل في مقطع الفيديو الذي نشره عبر حسابه على "فيسبوك"، أنه لم يبحث عن الشهرة أو المال من حديثه عن خلافاته مع شقيقته على السوشيال ميديا، وأوضح أنه رفض الظهور في العديد من البرامج في الوطن العربي بمقابل مادي كبير للحديث عن خلافه مع ياسمين وأحمد العوضي، كما أنه رفض الحديث في مداخلة هاتفية مع الإعلامي وائل الإبراشي.

وأكمل وائل حديثه: "أنا لو بدور على الشهرة كنت استغليت اسم أختى وشهرتها ومعارفها من زمان من 15 سنة من ساعة ظهوري في مسلسل برا الدنيا، وكل الميديا تعلم ذلك".

وأوضح أن خلافه مع شقيقته بدأ منذ 3 شهور بعد عيد ميلادها، قائلاً: "من 3 شهور جات فترة عيد ميلاد ياسمين ويوم عيد ميلادها نزل صور بينها وبين شخص.. الصور ضايقتنى وحسيت منها أن دى مش ياسمين.. كلمتها وقولت من إمتى بنعمل أعياد ميلاد بالشكل ده وتنزل على السوشيال ميديا ودى مش طريقتك وأنا مستغرب لقيتها بتقولي ما حدش ليه دعوة وأنا حرة ومش صغيرة وأنا كنت خايف على شغلها.. وحاولت أتكلم معاها مرة واتنين رفضت  كلامى جدًا.. أخوها عمل نفس الموضوع اترفض رفضًا باتًا واتقال له نفس الكلام واتعمل بلوكات معاها".

وتابع: "من يومين تلاتة لقيت منشورات بينها وبين الاستاذ على كل السوشيال ميديا، معنى البوستات ومعنى الكومنتات أن في علاقة بين الاتنين وباينة ومحدش يقدر ينكرها لأن الكلام واضح وصريح فبقيت عايز أفهم ايه اللي بيحصل ومن حقي وأنا بتكلم في الأصول وابتدى يجيلي إشاعات في كل حتة أنهم متجوزين في السر".

وأكمل وائل حديثه بخصوص موافقته على زواجها مرة أخرى، قائلًا: "ياسمين بعد طلاقها بفترة جت قالتلي أنا لو اتجوزت حد هيزعل منكم قولتلها يا ياسمين يا حبيبتي اتجوزي وأنا هبقى مبسوط وسعيد بيكِ وأنا أكتر واحد فرحنلك بس من فضلك اختاري صح".

واختتم حديثه بتوجيه رسالة مباشرة لشقيقته ياسمين عبد العزيز، قائلًا: "رسالة مني يا ياسمين يا حبيبتي ربنا ينجحك ويوفقك في حياتك أنا يمكن اتكلمت بشكل يضايق أنا آسف، ‏بس كنت عايز اعرف طبيعة العلاقة دي إيه بس، أنا كنت شايفك تحت وربنا فوق، فأنا من النهاردة اعتبريني بره حياتك تماما ومش ‏عايز حاجة منك أنتِ حرة في حياتك ومستقبلك بس أنا خلاص مش قادر أعيش حروب تانية أنا تعبت، ربنا يوفقك".‏

وكان وائل قد هاجم شقيقته النجمة ياسمين عبد العزيز، أمام الجميع، عبر حسابه الشخصي على موقع التواصل الاجتماعي "فيس بوك"، قائلًا: "بصى يا ياسمين يا عبد العزيز يا اختى، أنا معاكى وفى ضهرك من وأنتِ صغيرة شيلت مشاكل كتيًر بسببك من وأنتِ عيلة صغيرة، بداية من مشاكلك مع الشاعر وبرادة وأنتِ عارفة إن أنا اتاذيت فيها إزاي وقضية الشغالات مؤخرًا غير قضية الضرب اللى كانت بينك وبين بنت هشام سليم الممثلة الى لبستيها التورته فى وشها".

وتابع: "وقفت جمبك بكل ما أملك من قوة أدافع عنك فى كل موقف صعب مر عليكى ونسيت حياتى ونفسى عشانك وبقى كل همى أنا ووالدتك، إنك تكبرى وتبقى نجمة فى مجالك، سيبنالك اختياراتك كلها لنفسك ووفقنالك على معظم قراراتك وكنت الوحيد اللى ساندتك ووقفت جنبك فى طلاقك، لكن هنهرتل وتروحى تعرفى واحد أصغر منك بـ10 سنين لا من سنك وتتصورى صور مالهاش أى لازمة على حساب سمعتك وسمعتنا، لا ومحدش هيسمح، من امتى واحنا بنعمل أعياد ميلاد وتنزل على السوشيال ميديا، من امتى الناس بتجيب فى سيرتنا؟ ونقعد نتعاكس على السوشيال ميديا؟".

ومع ذلك حياتك وأنت حرة فيها، أنا هتكلم على الشق اللى يخصني، أنت مقاطعة كل العيلة عشان تعملى اللى على مزاجك، احنا دلواقتى وعايزين نفهم العلاقة دي إيه ورايحة على فين".

واختتم وائل حديثه: "أما بالنسبة للأخ الى ماشى وراكى فى كل حته وشايفك البيضة الدهب الى هتفقسله كل يوم احب أقولك يا راجل لما تيجى تدخل بيت تدخله من بابه يا راجل !! وتقعد مع رجاله البيت !!، دى الأصول وده الاحترام .. وطبعا لانك عارف انك مرفوض رافضا باتا فا عمرك ما هتعمل ده ومعندكش غير طريق الشمال الى انت سالكه من سنين مع بنات الناس !!، انا من راى كفايه عليك البطوله الى أخدتها والعربيه المرسيدس الهدية، وتركز فى شغلك وتسيبنا فى حالنا لان طول عمرنا فى حالنا ومحدش سامع عننا حاجه وملوش لازمه جو الصور والمعاكسات ده وانا مبخفش من تهديد حد".

وبعدها رد الفنان أحمد العوضي على هجوم شقيق ياسمين عبد العزيز، عبر حسابه على موقع "فيس بوك"، قائلًا: "أنهي بيت اللي أدخله من بابه، إن كانت هي اللي بتصرف عليك وعلى ابنك اللي مخبيه وراميه وهي بتدفعله مصاريف مدرسته، باب إيه يا بني إللي أدخله، هو انا شوفت راجل واقف جنبها، دي واحدة أنت مابتعملش حاجة غير انك بتستنزفها هي ومامتها".

وتابع "العوضي": "باب ايه يا بني اللي هدخله من بابه واكلم واحد بيتكلم على عرضه ولحمه قدام الناس، يا بني أنا من عين شمس منطقة شعبية، اتربيت على إن الأخت والأم والست الكلام عليهم من الكبائر".

وردًا على اتهام وائل عبد العزيز، لأحمد العوضي بحصوله على هدية سيارة، قال: "عربية ايه يا بني أنا أجري الحمد لله يعيشني كويس ويجيبلي عربية حلوة وبيت كويس، بمجهودي وشغلي مش على عرق واحدة ست".

واختتم أحمد حديثه، قائلًا: "باب ايه يا حبيبي اللي أدخله وأنت أصلا عايش باسمها، أنا شقيت على حالي بعرقي، لكن انت فشلت في كل شيء، فشلت كممثل وفشلت كأب وفشلت كأخ وفشلت كبني أدم".

وبعدها بساعات، قام الفنان أحمد العوضي بالاعتراف رسميًا بحبه لياسمين عبد العزيز، قائلًا: "بحبك يا ياسمين"، ولتقوم هي أيضًا بالرد أمام الجميع كاشفة عن حبها، قائلة: "بحبك يا أحمد"، ونشرا صورة تجمعهما معًا.

يذكر أن خبر ارتباط أحمد العوضي بياسمين عبد العزيز كان قد انتشر بعد نشره لعدد من الصور في عيد ميلادها الـ40، عبر حسابه على موقع "إنستجرام"، وعلق قائلًا: "عيد ميلاد سعيد يا ياسمين" ووضع قلوب حمراء، وظهر الثنائي في الصور بحميمية جعلت الجمهور يتساءل عن طبيعة العلاقة بينهما ووجود قصة حب تجمعهما من عدمه.

موضوعات متعلقة:

دنيا سمير غانم تكشف صلة قرابتها بفنانة شهيرة مفاجأة!

وصلة غزل متبادلة بين ياسمين عبد العزيز وأحمد العوضي لهذا السبب

شقيق ياسمين عبد العزيز يكشف تفاصيل جديدة عن علاقتها بأحمد العوضي ازاي عايشين مع بعض في بيت واحد!

منى فاروق تدفع شقيق ياسمين عبد العزيز للاعتذار لها أمام الجميع ما الحكاية؟